وێنەیەک لە تۆڕی کۆمەڵایەتی فەیسبوک بڵاوکراوەتەوە کە بانگەشەی ئەوە دەکرێت کەشتییەکی فڕۆکە هەڵگری ئەمریکی بێت بە ناوی ussBonnehome کە لە لایەن وڵاتی یەمەنەوە بە فڕۆکەی بێ فڕۆکەوان هێرشی کرابێتە سەر لە دەریای سوردا.
دەقی بانگەشەکە بەبێ دەستکاری:
یەمەن دوێنێ بە درۆن هێرشیان کردە سەر کەشتی فڕۆکە هەڵگری زەبەلاح ئەمریکی ussBonnehome لە دەریای سوردا !
زیانێکی زۆریان بە کەشتیەگەیاندووە !
یەمەنیەكان تاكە وڵاتن خاوەنی مەوقیفێكی مێژوین !
كۆتا جار هێرش كرابێتە سەر گەشتی گەلی ئەمریكی جەنگی جیهانی دووەم بوو كە ئەوكات ژاپۆنیەكان ئەنجامیاندا !
ئەم بارهەڵگرە ئەمریکییە لە ساڵی ٢٠٢٠ لە سان دیێگۆ ئاگری گرتووە نەوەک لە دەریای سور لەم دواییانەدا، هەروەها ئاگرەکە لەلایەن مەشقپێکراوێکی هێزی دەریایی ئەمریکییەوە نەوەک لەلایەن وڵاتی یەمەنەوە.
دوای گەڕانێکی پێچەوانەی یاندێکس، گەشتین بە ڕاپۆرێک کە باس لە ڕووداوەکە دەکات، و ئەوە دەخاتەڕوو کە کەشتییەکە ناوی USS Bonhomme Richard ە و لە ساڵی ٢٠٢٠ ئاگری لێ دەکەوێتەوە. هەروەها لەو راپۆرتەدا ڤیدیۆیەکیش دانراوە کە هەمان دیمەنی وێنەی بانگەشەکەی تێدا دەبینرێت.
بۆ پشتڕاستکردنەوەی ئەم ڕاپۆرتە و زانیاری زیاتر، گەڕانێکی ترمان لە یوتیوب ئەنجامدا بە دەستەواژەی USS Bonhomme Richard fire و گەشتین بە کۆمەڵێکی زۆر لە هەواڵ کە ڕووکەشی ڕووداوەکەیان کردووە و بەپێی هەواڵەکان، ئەنجامی ئاگرکەوتنەوەکە بەهۆی تەقینەوەیەکەوە بووە کە ئەندامێکی نەیڤی سییڵ (هێزی دەریایی ئەمریکی) ئەنجامی داوە بە ناوی ڕایەن مەیس، دوای ئەوەی لە ژێر مەشقدا بووە و دوورخراوەتەوە.
هەواڵێک لە ئەی بی سی نیوس کە ڕووکەشی ڕووداوەکە دەکات.
هەروەها لە هەواڵێکی دواتری ڕۆژنامەی گاردیان پشتڕاستکراوەتەوە کە گەنجە ٢١ ساڵەکە لە تاوانی ئاگر بەردان لە کەشتییەکە بە ئەنقەست بڕیاری بێتاوانی بۆ دەرکراوە لە دادگا. ئەمەش دوای ئەوە دێت کە دادوەری سەربازی دێریک بەتڵەر ڕایگەیاند کە بەڵگەی تەواو نەبووە لەسەر ئەوەی کە گەنجەکە بە ئاگری بەردابێت لە کەشتییەکە.
بانگەشەکە چەواشەکارانەیە و وێنەکە لە چوارچێوەیەکی ناڕاستدا بەکار هاتووە.
