کۆمەڵێک پەڕاو و هەژمار لە تۆڕی کۆمەڵایەتی فەیسبوک ڤیدیۆیەکیان بڵاو کردۆتەوە کە بانگەشەی ئەوە دەکەن کە هێزەکانی ئەمریکا لە فڕۆکەخانەی ڤیکتۆریا لە بەغدا خەریکی مەشقکردنن.
ئایا ڕاستی بانگەشەکە چییە؟
ڤیدیۆکە لە لایەن پەڕاوێکەوە بڵاو کراوەتەوە لە تۆڕی کۆمەڵایەتی فەیسبوک کە زیاتر لە ٨ هەزار بینەر و زیاتر لە هەزار کارلێکی هەیە.
ڤیدیۆیەکە دەگەڕێتەوە بۆ ساڵی ٢٠١٤ لە ویلایەتی کینتاکی لە ئەمریکا و شوێنەکە هی مەشقی چەکە بۆ خەڵکی مەدەنی نەک هێزە سەربازیەکانی ئەمریکا لە بەغدا
تیمی فتبینوا بەدواداچوونیان بۆ ڤیدیۆکە کرد لە ڕێگەی گەڕانی پێچەوانەی یاندێکسەوە و گەشتین بە هەمان ڤیدیۆ لە ئینستاگرام کە پەڕاوێکی فرۆشتنی شتومەکی چەک بڵاوی کردۆتەوە لە ٢٠٢٠.
هەرچەندە ئەمە دەیسەلمێنێت کە ڤیدیۆکە کۆنە و هی ٢٠٢٣ نییە، بەڵام هیچ زانیارییەکی تر نەدرابوو کە شوێنەکە کوێیە. بۆیە بە بەکار هێنانی دەستەواژەکانی سەر ڤیدیۆکە لە ئینستاگرام (Shooting from a minigun with tracers at night) گەڕانێکی دیکەمان ئەنجامدا و گەشتین بە هەمان ڤیدیۆ لە یوتیوب کە لە ساڵی ٢٠١٤ بڵاو کراوەتەوە.
هەروەها دەردەکەوێت کە لە هەمان هەژماری یوتیوب ڤیدیۆیەکی تر بڵاو کراوەتەوە کە ٨ دەقیقەیە و ڤیدۆی یەکەمی لێوە دەرهێنراوە، واتە ڤیدیۆی بانگەشەکان ١ داقیقەیە کە لە ڤیدیۆ ٨ دەقیقەییەکە بڕدراوە.
دوای وردبونەوە لە ڤیدیۆکە، لە سەر تیشێرتێک وشەی KCR ئەبینرێت کە کورتکراوەی (Knob Creek Range)ە.
دواتر لە رێگەی گەڕانێکی گوگڵ ماپسەوە دەرکەوت کە ناوی شوێنێکی مەشقکردنی مەدەنییە لە ویلایەتی کینتاکی لە ئەمریکا.
بە بەراوردکردنی دیمەنەکانی ناو ڤیدیۆیەکە و وێنەکانی گوگڵ ماپس، دەردەکەوێت کە شوێنەکە هەمان شوێنی ناو ڤیدیۆیەکەیە.
ڤیدیۆکە هی کات و روداوێکە کە پایوەندی بە بانگەشەکەوە نییە، بۆیە بانگەشەکە با چەواشەکارانە دادەنرێت.
